Senda da detgas da Paul Luziet – nr. 9
Deutsch
Paul Luziet morda el meil
Stuschond Paul Luziet encunter ils 90, eis el sedurmentaus per adina. Grazia agl aunghel ha el astgau prender cun el in buordi scuas. A s. Pieder di el ch’el vegli vender talas alla Barla da Cahuonz ed al miert ch’ei daus giu da baun.
S. Pieder ri buntadeivlamein, encurschend mo memia bein, che quei era mo ina stgisa de Paul Luziet per puder zaco da porta en. El di: «Moscha, va en ed emprova, oz ha ton sco jeu sai s. Paul, tiu s. patrun, de far las empustaziuns dil purgatieri cheugiu. Fai spert e tuorna puspei, schiglioc fas ti podà aunc ina marletga cheuen.» Paul Luziet dat in segliun – sco da sias uras giud chischner – ed ei en. Lu betta el ano a s. Pieder scuets e scuettas e di riend e beaus sco quels aunghels senza macla: «Jeu sun en e stun en, e persuenter sas ti ver tut mias scuettas.» Detg quei, fui el lunsch viadenta parvis, manizzond combas sco da sias uras sillas plauncas de Chiltgadira, cura ch’el veva giu envidau ora ils mats de Trun. S. Pieder marmugna aunc enzatgei pauc ella barba e manegia lu siper igl aunghel tut surstaus: «Quei astgass aunc dar las dètgas marletgas cun quei schani cheuen!»
