senda da detgas da paul luziet – nr. 2
Deutsch
Paul Luziet va a scola
Paul Luziet numnava siu scolast il surmeister Sabiut. Ed era en scola ha el fatg enqual cattavegna.
«Jèssas, ina miur va dallas combas dil scolast si!»
In murtè havess buca saviu effectuar tanient. Surmeister Sabiut trembla sc’in fegl e lai dar siu cudisch digl Uffeci de Morts ordamaun, sco sch’el fuss vegnius schiraus sigl amen…
La miur suttapeis po fil a streh mitschar, fa in segl sc’in arviul e setschenta sil cudisch aviert de Paul Luziet… Lez, sperts e pratics sc’in plattè, siara sias Mudinas cun tala forza e prontezza che la paupra miuretta miera sigl amen denter dus himnis ed in’antifona…
Loschs de sia victoria, arva Paul Luziet vonzeivi siu cudischun, peglia la trofea per la cua e vul surdar quella en tutta modestadad a siu surmeister. Mo lez, vesend striegn da bi clar di, dat in bierl, in segl, dus sbargats suls bauns en e vi e da finiastra ora…
