Senda da detgas da Paul Luziet – nr. 1
Deutsch
Paul Luziet vegn sin quest mund
Mo il pli legher – per l’onda il pli anguschus di de sia veta eis ei stau lezzaga ch’il schani era serabitschaus entochen sin tetgcasa, gie tochen osum sum il gebel… (Enzaco, zacu veva l’onda giu rugalau zatgei pauc vid il tetg da slondas ed emblidau de prender naven la scala). Basta, tuttenina sortend la Zia ord casa, aud’ella giud il spitg: «Onda, peglia mei sche ti sas…» In griu e l’onda dat bunamein vi da mauls; mo Paul ri propi da cugliun cudizzont e mo tement’ella aunc pli fetg, stend sin peis sc’in conif e fagend smanis da veritabel stroli. Mo prendei mira! Tuttenina seleischna il herox… e sefuretga per cletg e ventira vid la crusch-lenn sisum il spitg-casa; tgei cletg ch’el vev’aunc en rassa!
Mo uss eis ei mender sefar de herox e quellaga ha el tema, segeinond el gie denter tschiel e tiara sc’in stratsch giu da tschiel. Per ventira piarda l’onda buca la curascha, sefa si, vegn dabot neutier cun la scala e liberescha il stroli da sia penderletga.
