Senda da detgas da Paul Luziet – nr. 6
Deutsch
Paul Luziet va a catscha I
Paul Luziet ha empruau ora differentas sorts da catscha.
Gie, nies catschadur de cavreuls ei oz aschi incantaus dil bellezia peil, della fuorma eleganta de quei niebel tgierp aschi bein proporzionau, dil bi culiez satel, aschi migeivel sturschius, dil tgau aschi amieivel, e lu oravontut de sia corna, fuorma-cruna de princessa eleganta, de ses egls brin-mellens d’expressiun aschi innocenta, affonila, ch’el sa nungrazia sedecider de smaccar sil tgiet per violar zanua quella bellezia senza terrar ses sentiments d’amur pil bi e bien ch’il Scaffider ha implantau en quei animal de bellezia perfetga…
Perquei admira e tuorn’el ad admirar quella perfetgadad naturala. E mirond el uss aunc directamein els egls a quella bufatga creatira, la pli nobla dils uauls grischuns, sa el far nuot auter pli che «fui, fui» per ch’el vegni gie buca tentaus de tuttina aunc schar giu il siet…
